<CHRONOLOGIA SUMMORUM PONTIFICUM>
Honorius IV, qui confirmavit ordinem Praedicatorum pontificatus sui anno primo, approbavit regulam nostram anno sui pontificatus decimo, nobis traditam ab Alberto olim Ierosolymitanae ecclesiae patriarcha. Dicta approbatio facta est anno Domini 1213.
Quam regulam successor eius Gregorius papa IX auctoritate apostolica confirmavit anno pontificatus sui tertio, anno Domini 1216.
Eandem regulam Innocentius IV correxit, declaravit ac etiam mitigavit per dominum Hugonem, Sanctae Sabinae cardinalem, ordinis Praedicatorum, et Guillelmum, Anteradensem episcopum, anno Domini 1248, pontificatus ipsius Innocentii anno quinto.
Post hunc Innocentium sedit Alexander IV, qui sedit annis septem; qui dedit privilegium de confessionibus et de libera sepultura.
Post hunc Alexandrum sedit Clemens.
Post hunc sedit Urbanus IV, qui sedit annis tribus cum novem mensibus qui dedit privilegium de altari viatico.
Post hunc sedit Gregorius X, qui sedit annis quattuor, anno Domini 1272.
Post hunc sedit Innocentius V, qui sedit quinque mensibus, de ordine Praedicatorum.
Post eum Adrianus V, qui sedit uno mense et novem diebus.
Post eum Ioannes XXI, natione Hispanus, qui octo mensibus sedit.
Post eum Nicolaus III, anno Domini 1277, ille fuit papa 77 dies.
Post eum Martinus IV.
Post illum Honorius V, qui praecepit nobis quod dimitteremus cappas barratas, et tunc accepimus cappas albas, anno Domini 1285.
Post eum Nicolaus IV, qui innovavit regulam nostram.
Post eum Caelestinus, qui resignavit papatum.
Post eum Bonifatius VIII, qui fecit Sextum Decretalium; qui nobis in urbe Romana ecclesiam Sancti Martini papae in Montibus tradidit, cappas albas confirmavit; qui captus est ante mortem suam Ananiae, mortuus tamen Romae et ibidem sepultus.
Post eum Benedictus, qui fuit de ordine Praedicatorum; qui parvo tempore vixit.
Post eum Clemens, qui fuit archiepiscopus Burdegalensis.
Post eum Ioannes XXII, qui nobis dedit privilegium exemptionis pontificatus sui anno primo; et privilegia conservatorum, et privilegium "Super cathedram" et privilegium confessionis seu declarationis quod incipit "Vas electionis".